Wan Tausen Wan Nait bilong Papua New Guinea



Masalai Wokim Tripela Ailan
(Wantok 418, Me 22, 1982, pes 19)


Long [p]asis bilong Kandrian long Wes Nu Briten [Provins] i gat tripela naispela ailan i sanap long wanpela lain tasol [Moewehafen Pipel]. Tripela i wanmak na antap bilong wan wan i stret olsem ples balus. I luk olsem bipo ol i wanpela tasol, na wanpela samting i bin katim tripela hap.

Na tru tumas, ol lapun i stori olsem. Wanpela bikman bilong ples ol i kolim Ais [Ailan] i sindaun stori long Wantok ripota [wokman bilong niuspepa] i raun long dispela hap. Na wanpela lapun meri tu i sindaun long dua bilong haus bilong em long nambis na i stori tu. Nem bilong lapun mama ya, em Selseme Martina.

Stori i go olsem. Bipo bipo tru i gat wanpela masalai man. Em i draipela bun tru. Nem bilong em Koran Rainge. Em i lusim bus na kamdaun long ples ol i kolim Ais. Dispela em i wanpela trik nem tasol, long wanem, wanpela riva i gat maus bilong em long arere bilong ples. Solwara i save pulimapim dispela riva. Tasol long taim bilong ren, bikpela tait bilong bus i kamdaun na wara i kol, i olsem ais. Olsem na em i gat dispela nem Ais. Nem tru em i Aruba.

Orait. Masalai Koran Rainge i laik pilai liklik na em i kisim tamiok ston bilong em na i katim wanpela longpela ailan i go tripela hap. Bipo ol i luk olsem wanpela longpela bret. Masalai i katim na Ailan Kangro na Pugi na Aviglo i kamap. Masalai i subim ol i go ausait longwe liklik long nambis, na i luk olsem wanpela riva i kamap. Tasol i no riva, i solwara tasol. Na tude ol bikpela sip i save kam insait long dispela rot tasol.

Bihain long Masalai Koran Rainge i katim Ailan Aviglo pinis, em i laik go moa long hap bilong Kandrian na katim Maunten Aiwo gen. Tasol masalai meri bilong dispela hap bus i tambuim em na rausim em i go. Masalai ya i masalai meri nem bilong em Arung. Arung i kros i tok em i no laikim ol ailan tasol i stap. Em i laikim sampela graun i mas pas wantaim bikples. Olsem nau Kandrian na Aiwo na Yumelo [Iumielo] i stap.

Masalai man i surik go bek nau. Hatwok bilong em i mekim skin bilong em i wara na nek i drai. Olsem na em i kamap long Wara Ais. Dispela wara i hap solwara na hap kolwara, na tupela i miks. Dring pinis, nau Koran Rainge i laik klinim bus na wokim gaden. Tasol, tarangu tupela kain wara insait long bel bilong em i pait na em i pilim pen.

Orait, nau em i kirap wokabaut long hap sankamap bilong slekim pen long bel. Na pispis i kilim em na 8-pela taim olgeta em i pispis long taim em i wokabaut i go. Olsem na tude i gat 8-pela gutpela kolwara i kamaut long graun long dispela hap. Nem bilong 8-pela em hia: Apolo, Ariep, Arunkenekit, Sikinlo, Amulo, Atimere [Em i givim 6 tasol!].

Na bihain masalai i tanim i go bek long hap Kandrian na em i wok long pispis gen. Olsem na long dispela hap tu i gat 8-pela baret i kamap tude. Nem bilong ol em hia: Ayalao, Amatun, Emilo, Auyamo, Kasiglo, Kalamlo, Aralo na Amalo.

Maski pispis planti, sik bilong masalai Koran Rainge i no laik pinis. Olsem na em i go bek long bus na em i dai.

Tasol nau ol Kandrian i get tripela ailan na 16 baret kolwara. Na ol i no save dringim wara bilong Riva Ais.

[Selseme Martina (i bin raitim)
Ais Ailan
Wes Nu Briten Provins]


Return to Thomas H. Slone’s home page.

© 1996 by Thomas H. Slone, editor.

Last modified November 1, 1996.